2 patay sa pagbunggo sang pick-up sa motorsiklo sa Iloilo

ILOILO CITY – Duha ang patay samtang duha ang pilason matapos ginbungguan sang pick-up ang motorsiklo sa Tabucan, Cabatuan, Iloilo.
Ang mga napatay nga biktima amu sanday John Porras, 30, sang Ungka, Jaro, Iloilo City nga driver sang motorsiklo kag angkas sini nga si RJ Escutiña, 30, sang Bantayan, San Enrique, Iloilo.
Sa interview sang Bombo Radyo Iloilo kay PO2 Jasper Canto, traffic investigator sang Cabatuan Municipal Police Station, ginpahayag sini nga nag-overlap ang motorsiklo nga ginamaneho sang mga biktima kag wala ang mga ini makalikaw sang masugata ang Toyota Hi-Lux nga ginamaneho ni Leopoldo Banquillo, 49, sang Janiuay, Iloilo.
Pilason naman ang mga sakay sang isa pa ka motorsiklo nga ginamaneho ni Raffy Porras sang Cabugao Sur, Sta. Barbara kag upod sini nga si Marlon Porras, 27, sang Gines, Janiuay, Iloilo nga nag-angkon sang pilas sa ulo kag nagkalain-lain nga bahin sang lawas.
Sa karon preso na sa Cabatuan Police Station ang driver sang pick-up.