DINGLE, ILOILO – Nagapangatubang sang kaso nga attemted homicide ang duha ka Philippine Marines matapos naulamid sa kinagamo sa Dingle, Iloilo.
Nagapabilin sa presuhan sanday Sergeant Franz Dominik Principe nga na-assign sa Lanao del Sur kag si Private First Class Vicente Catunao Jr. kag na-assign sa Tawi-tawi, lunsay tumandok sang Brgy. Abangay, Dingle, Iloilo.
Sa interview sang Bombo Radyo kay Police Captain Fernando Punzalan Jr., hepe sang Dingle Municipal Police Station, iya ginpahayag nga magka-upod nga nag-inom sa isa ka kiosk sa banwa sanday Principe kag Catunao.
Bangud nga hubog na ang duha ka Philippine Marines, hinali lang nga ginsipa ni Principe ang tag-iya sang kiosk nga wala man lang sang rason.
Nagpalupok sang service firearm si Principe rason nga gilayon nga nagresponde ang Barangay Tanod apang liwat naman nga nagpalupok ang Philippine Marines.
May pulis nga nagresponde kag nagpalupok naman sang loose firearm si Catunao apang wala sang may naigo.
Nakuha kay Principe ang service firearm nga 9mm Glock 17, 2 ka magazine, 11 ka bala kag 1 ka fired cartridge samtang kay Catunao naman, nakuha ang loose firearm nga caliber .45 Armscor, 2 ka magazine, 12 ka bala kag 1 ka fired cartridge.
