Ginatan-aw sang kapulisan nga sinuyaay ang ginhalinan sang kinagamo sang duha ka grupo sang mga estudyante nga involved sa stabbing incident sa distrito sang Molo.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station (ICPS) 4, iya ginpahayag nga sa sulod pa lang nga daan sang buluthuan, may indi na pag- intindihanay ang duha ka grupo sang pamatan-on nga ginalakipan sang grupo sang apat ka mga Senior High School students batok sa apat ka mga freshmen students.
Sang nag-gwa ang mga estudyante pasado ‘las 12 sang udto, didto kag nagtabu-ay ang banas sang duha ka grupo kag nagluntad ang kinagamo.
Nakaagum sang stab wound sa butkon ang 15-anyos nga halin sa grupo sang mga freshmen, pilason man ang 16-anyos nga halin naman sa grupo sang mga Senior High School students.
Ginkustodiya naman sang ICPS 4 ang 5 ka mga estudyante, nakapalagyo naman ang duha sa apat halin sa grupo sang freshmen, samtang gindala agud mabulong sa ospital ang 16-anyos nga solterito.
Narecover sang kapulisan ang apat tanan ka patalom sa mga estudyante.
Padayon naman nga gina-imbestigaran sang kapulisan kun miyembro sang mga ‘gang’ ang mga pamatan-on kag kun paano nga nakasulod ang patalom sa amo nga buluthuan.
