Ginkumpirma sang awtoridad nga ginbawian gid sang kabuhi ang piloto kag ang co-pilot sini matapos nakabunggo ang bag-o lang nag-abot nga Air Canada Express plane sa isa ka fire truck sa runway sang LaGuardia Airport sa New York, USA.
76 ang sakay sang eroplano, kag sa sini nga numero, 41 ang nakaangkon sang samad kag ginabulong na sa local hospitals.
Suno sa Port Authority spokesperson, natabuan nga naga-responde ang aircraft rescue and firefighting truck sa reports nga may baho sa United flight sang ginbungguan ini sang nag-abot ang eropano pasado alas onse na sang gab-i.
Nakit-an nga nagahugpa ang eroplano sa Runway 4 sang 11:45 p.m. samtang nagatabok naman ang fire truck sa runway nga alagyan gid sang amo nga aircraft.
Sa audio clip naman halin sa air traffic control antes ang crash, mabatian ang controller sa radio transmission nga naga-istorya nahanungod sa request para sa emergency vehicle nga magtabok sa tarmac, kag daw kaangay nga nagahatag na sang clearance antes ini nagsala nga pauntaton kuntani ang truck.
“Stop, Truck 1. Stop,” base sa transmission. “Frontier 4195, stop there please. “Stop, stop, stop, stop.”
“Truck 1, stop, stop, stop,” pila ka beses pa nga ginhambal sang controller. “Stop truck one. Stop!”
Diri na kag naigo sang aircraft ang firetruck kag nasamad gid ang unahan nga bahin sang eroplano.
Halin ang eroplano sa Montreal. Ini nga CRJ-900 plane ang gina-operate sang Jazz Aviation nga amo ang regional partner sang Air Canada.
Gina-imbestigaran na sang National Transportation Safety Board ang amo nga insidente sa ikaduha sa pinakadaku nga airport sa New York.#
