Nag-request ang kampo ni former President Rodrigo Duterte sa International Criminal Court (ICC) nga i-disqualify ang duha ka mga Pilipino nga abogado nga magatiglawas sang drug war victims sa korte.
Ini amo ang ICC-accredited lawyers nga sanday Atty. Joel Butuyan kag Atty. Gilbert Andres nga una na nga gin-appoint sang korte bilang mga common legal representative.
Sa 11 ka pahina nga request sang defense lawyer nga si Nicholas Kaufman, ginpahayag sini nga dapat kakason sanday Butuyan kag Andres bangud sa grounds nga “impediment to representation” kag bangud sa ginaalegar nga “conflict of interest.”
Ginapa-disqualify man sang kampo ni Duterte si Atty. Nicolene Arcaina nga ginpili nanday Butuyan kag Andres bilang case manager.
Gin-redact ukon wala ginpakita sa publiko ang mga detalye sang rason ni Kaufman sa iya nga hingyo.
Nahibaluan nga ang gin-appoint nga common legal representatives amo ang magatindog para sa pangkabug-usan nga interes sang mga drug war victims. Lain sila sa ICC prosecutor nga amo naman ang in charge sa pag-prosecute sang kaso nga gin-file batok sa suspek.
Si Andres nga taga-Iloilo kag si Butuyan ang lunsay halin sa Center for International Law nga madugay na naga-represent sang drug war victims.
Nahibaluan nga base sa schedule sang ICC, maga-umpisa na ang confirmation of charges hearing kay Duterte sa Pebrero 23.
