ILOILO CITY – Ginsipa sa serbisyo ang duha ka mataas nga opisyal sang Police Regional Office 6 (PRO-6) kag duha pa ka police officer matapos mapamatud-an nga guilty sa pagkaulamid sa iligal nga droga kag kaso administratibo.
Sa interview sang Bombo Radyo Iloilo, ginpahayag ni National Police Commission (Napolcom)-6 director Atty. Joseph Celiz nga lakip sa mga gin-dismiss nga opisyal amo sanday Supt. Ipil Dueñas nga intelligence officer sang Iloilo City Police Office (ICPO) kag Supt. Roderick Condag nga intelligence officer naman sang Iloilo Provincial Police Office (IPPO)
Nagapangatubang ang duha sang kaso nga incompetence kag gross neglect of duty.
Suno sa Napolcom, nagsugod ang ila imbestigasyon batok sa duha ka police officials matapos ginhingadlan ang mga ini ni Presidente Rodrigo Duterte nga mga narco-cops ukon may kaangtanan sa iligal nga droga.
Magluwas sa pag-dismiss sa serbisyo, indi man makuha sang nasambit nga mga pulis ang ila retirement kag indi na mahimo magtrabaho sa anuman nga ahensiya sang gobyerno.
Samtang ginsipa man sa serbisyo sanday PO1 Erwin Salido sang Regional Traffic Management Office nga assigned sa Roxas City bangud sa pagpeke sang mga dokumento kag Po1 Regie Ruiz nga nagapangatubang sang kaso nga physical injuries.