CULASI, ANTIQUE – Yara na sa maayo nga kahimtangan ang 2 ka pulis sang Pandan Municipal Police Station matapos naaksidente samtang sakay sa police car sa Culasi, Antique.
Nakaangkon sang pilas sa ulo kag gasgas sa lawas ang driver nga si Police Staff Sergeant Inocencio Tasaria samtang gasgas sa lawas naman ang naangkon ni Police Captain Bryan Alamo, hepe sang Pandan Municipal Police Station.
Sa interview sang Bombo Radyo kay Alamo, iya ginpahayag nga halin sila sa Antique Police Provincial Office matapos nagtambong sa inagurasyon sang mga proyekto kag nagapapauli na sang natabo ang aksidente.
Suno kay Alamo, hinali lang nga nagpalangyami kag nagpalangdulom ang panulok ni Tasaria rason nga nakabunggo sa van ang ila ginasakyan nga patrol car.
Magluwas sa van nga nagupi, nagasgasan man ang duha pa ka salakyan matapos nga naatrasan sang patrol car.
Sa subong, nagapabilin sa hospital si Tasaria kag natalana nga ipaidalom sa dugang nga medical examination.
