ILOILO CITY – Ginpanginwala sang duha ka mga punong barangay sa syudad sang Iloilo nga nagtapungolay sila kadungan sang ginpatigayon nga Lakbay Aral.
Sa interview sang Bombo Radyo kay Punong Barangay Madeo Sultan sang Simon Ledesma, Jaro, iya ginpahayag nga wala sang kamatuoran nga nagtapongulay sila ni Punong Barangay Rico Acap sang Mohon, Arevalo.
Suno kay Sultan, wala sila nakaistoryahanay ni Acap rason nga wala sang kamatuoran nga sila ang nag-away nga duha.
Magluwas diri, gin-athag man sang natungdan nga indi matuod nga isa siya ka maoy sa ila barangay.
Ginakswestyon man ni Sultan kun nga-a wala sang may nagpalapit sa iya agud magpamangkot tuhoy sa kun ano ang matuod.
Samtang, ginpahayag ni Sultan nga ang ila pagpatigayun sang Lakbay Aral ang para nga makatuon sang best practices nga mahimo man ipatuman sa ila barangay.
Natun-an nila suno kay Sultan amo ang husto nga paghaboy sang basura kag ang pagproseso sang mga recyclable materials.
May kaangtanan diri, gin-athag man ni Punong Barangay Rico Acap sang Mohon, Arevalo nga wala sang kamatuoran nga nagtapungolay sila ni Sultan.
Malaw-ay suno kay Acap nga may yara sang nagalinapta nga istorya nga wala man sang kamaturoran.
Sa pihak nga bahin, ginpahayag man ni Acap nga may yara sila sang Material Recovery Facility sa ila barangay.
Natun-an man nila sa Lakbay Aral suno kay Sultan ang husto nga paghaboy sang basura.
Kun tani kun may yara sang makinarya ang mga barangay, mahimo gid nga sundon ang pag-process sang mga basura agud himuon nga abono.
Gin-athag man sang natungdan nga indi lagaw ang ila ginhimo sa Lakbay Aral, kundi pagtuon sang mga posible mabulig sa ila tagsa ka komunidad.
