Apisar nadakpan na sang mga pulis ang duha sa apat ka mga suspek nga nagtaban sang masobra P1.5 million gikan sa duha ka mga biktima sa Barangay Agdahon, Passi City, Iloilo, wala na-recover ang kabug-usan nga cash.
Ang mga gin-aresto amo sanday Carlos Alcarde, 44, kag Adrian Pineda, 25, lunsay pumuluyo sang banwa sang Calinog, kag lunsay man nadakpan sa amo nga banwa.
Sa interview sang Bombo Radyo kay Pol. Lt. Col. Dennis Pamonag, hepe sang Passi City Police Station, iya ginpahayag nga nadakpan una si Alcarde sa Brgy. Cabagiao kag sunod nga nadakpan si Pineda sa Barangay Lampaya.
Nakabulig ang mga footages sang closed-circuit television (CCTV) camera nga natipon sang mga pulis agud nga matumod ang identity kag address sang duha ka mga suspek.
Sa imbestigasyon sang mga pulis, na-guwa nga si Pineda ang empleyado man mismo sang hardware store sa Calinog, Iloilo kun sa diin nagatrabaho ang mga empleyado nga amo ang biktima sa nasambit nga holdup incident.
Posible suno sa hepe nga nasaulo na ni Pineda ang hulag sang nag-deposito nga empleyado bangud nga masobra isa ka tuig naman ini nga nagatrabaho sa amo nga hardware store.
Sa masobra P1.5 million nga ginkuha sang amo nga adlaw, yara na lang sa P247,000 ang na-recover sang mga pulis.
Suno kay Pamonag, may duha pa ka kaupdanan sanday Pineda kag Alcarde, apang padayon pa subong nga ginapangita.
Ginpahayag ni Pamonag nga gintuad sang mga arestado nga gin-tunga nila ang kuwarta sa ila nga apat, ginbayad sa utang, kag gintaya sa sugal lakip na sa e-sabong.
Yara na ang duha sa kustodiya sang Passi City Police Station kag natalana nga ipasaka ang kaso nga robbery subong nga adlaw, Marso 31.
Wala sang iban pa nga criminal record ang duha ka mga lalaki antes ang amo nga insidente.
