Duha na lang liwat ka modernized motorbanca ang nagabyahe sa ruta nga Parola Wharf-Jordan Wharf and vice versa.
Ini matapos ginpauntat sang Jordan Motorbanca Cooperative ang byahe sang duha ka iban pa nga modernized vessel kaina sang aga.
Sa interview sang Bombo Radyo kay Engineer Fernando Enalpe, pinuno sang Jordan Motorbanca Cooperative, iya ginpahayag nga indi siya kumpiyansa sa kapasidad sang duha ka vessel amo nga ginpaiway anay ang paglayag sini sa kalalawran agud nga indi makompromiso ang safety sang mga pasahero.
Suno kay Enalpe, may yara pa sang i-check sa balanse sang duha ka vessel.
Bangud sa natabo, liwat nga naatrasar ang mga pasahero sa pantalan.
Apang pahayag ni Enalpe, na-kontak na niya ang builder kag natalana naman nga mag-abot ang ila nga mga tinawo agud nga tsekyaron ang duha ka nasambit nga modernized sea vessel.
