ILOILO CITY – Natalana pa kuntani nga magpauli sa iya pamilya sa Mayo ang isa sa mga suldado nga Ilonggo nga napatay sa engkuwentro batok sa Abu Sayyaf sa Inabanga, Bohol, kahapon.
Suno sa manghod ni Corporal Meljune Camarines Cajaban nga si MC Marie, nakatawag pa ang ila utod sang nakaligad nga semana nga nagapangamusta kag ginpabutyag nga maauli ini sa ila lugar sa Pandan, Leon, Iloilo.
Pero ginkakibot na lang nila sang mabaton ang impormasyon nga patay na ang iya utod.
Si Meljun ang ika-duha sa lima kag mag-utod kag miyembro sang PMA Masilak Class of 2009.
Magluwas kay Cpl. Cajaban, napatay man sa nasambit nga engkuwentro ang isa ka Ilonggo nga si Sgt. John Dexter Duero sang Managopaya, Banate, Iloilo.
Samtang padayon naman ang pagpakig-angot sang 3rd Infantry Division sang Philippine Army sa 47th IB may kaangtanan sa detalye sang pagpauli sang bangkay sang mga suldado nga napatay.
Sa interview sang Bombo Radyo kay 3ID spokesperson Lt. Col. Ericson Rosana, ginpahayag sini nga ila na ginapreparahan ang pagsug-alaw kag paghatag pasidungog sa napatay nga mga Ilonggo soldiers.
Ginakabig suno kay Rosana nga mga fallen heroes ang nasambit nga mga suldado kag nagakadapat nga kilalahon ang ila nahimo ilabi na ang pagpatay sa sub-group leader sang Abu Sayyaf nga si Muammar Askali alyas Abu Rami.