Duha na ang kumpirmado nga patay kasunod sang magnitude 7.4 nga linog sa Davao Oriental kaina sang aga.
Ginkumpirma ini ni Davao Oriental Governor Nelson Dayanghirang kag ni Davao Rep. Cheeno Almario amo man sang Davao City Police Office (DCPO).
Base sa pulis, napatay ang 80-anyos nga lalaki matapos narumpagan sang sementado nga pader sa Purok 3, Soliman, Barangay Tomas Monteverde, Davao City.
Sa Mati City, isa man ka senior citizen ang ginbawian sang kabuhi matapos natumbahan sang poste sang kuryente.
Apektado man sang linog ang suplay sang kuryente sa probinsya. Gin-evacuate man ang mga pasyente sa pito ka mga ospital agud ipaidalom sa inspection ang integrity sang mga building.
Natabo ang linog eksakto 9:43 kaina sang aga nga ang sentro yara sa Manay, Davao Oriental.
Una gin-report sang Philippine Institute of Volcanology and Seismology (Phivolcs) nga magnitude 7.6 ang kabaskugon sini, gin-downgrade sa 7.5, kag sunod nga gin-revise liwat sa 7.4 magnitude.
Gin-isyu naman ang tsunami warning 11:43 kaina sang aga para sa Davao Oriental, Dinagat Islands, Surigao del Norte, Surigao del Sur, Eastern Samar, Southern Leyte, kag Leyte. Ginbawi man ini sang ahensya 1:43 subong nga hapon.
As of 4:00 p.m., 299 na ka mga aftershocks ang napagkit sang Phivolcs.
