Nagpadala ang Philippine Coast Guard (PCG) sang duha ka mga barko agud siguruhon ang seguridad sang mga manugpangisda nga Pinoy sa Iroquois ukon Rozul Reef sa West Philippine Sea matapos ang pagpang-harass sang helicopter sang People’s Liberation Army (PLA) Navy sang China.
Suno kay Commodore Jay Tarriela, PCG spokesperson for the West Philippine Sea, ang gin-deploy ni PCG Commandant Admiral Ronnie Gil Gavan amo ang vessels 9702 kag 4411.
Pahayag ni Tarriela, ang ila pagpadala sang vessels ang nagatuyo nga maghatag sang ebidensya nga may aktibo nga presensya sang Filipino fishermen sa West Philippine Sea.
Base sa video footage sang mga local fishermen nga ginsapubliko sang PCG subong lang nga Disyembre 2, nakit-an ang helicopter sang Chinese Navy nga nagalupad sang 15-18 ka tapak sa ibabaw sang Filipino fishing boats. Natabo ini nga insidente sang Nobyembre 27 kag 28.
Sang nabaton sang PCG ang report, ginpadala na sini ang duha nila ka vessels lakip na ang BRP Melchora Aquino.
Samtang pakadto sa Rozul Reef, naka-eksperyensya pa ang PCG vessels sang delikado na naman nga maneuvers sang duha ka Chinese Coast Guard vessels nga malapit sa Escoda (Sabina) Shoal sa tunga-tunga sang 8 p.m. kag 10 p.m. sang November 30.
Nahibaluan nga antes sini nga insidente, may nauna na nga reports sang pagpang-harass sang PLA Navy helicopters sa PCG vessels kag marine scientists sa ila research missions sa West Philippine Sea.
Ang Iroquois Reef nahamtang 128 nautical miles halin sa Palawan kag sulod sa 200-nautical mile exclusive economic zone (EEZ) sang Pilipinas.
