ILOILO CITY – Nag-agom sang lagob sa nagkalain-lain nga bahin sang iya lawas ang isa ka kabulig sa balay matapos nga ginapahayag ginsakit sang bata sang iya amo sa Brgy. Cordova Sur, Tigbauan, Iloilo.
Ang biktima ginkilala nga si Alyas Princess, 20 anyos kag residente sang Brgy. Jereos, Lapaz, Iloilo City.
Sa interview sang Bombo Radyo kay Kagawad Helen Amaba sang nasambit nga barangay, iya ginpahayag nga base sa panaysayon sang biktima ginlampusan sya sang dustpan kag ginsumbag sa ulo sang bata sang iya amo matapos nga naakig ini bangud gina-alegar nga wala sya nagatrabaho kag masami lang nagagamit sang iya cellphone.
Suno kay Amaba, makatatlo na nga bes nga natabo ang pagpangsakit kay Alyas Princess apang subong lang sya nangisog nga ipalab-ot ini sa otoridad.
Natalana naman nga ipaidalom sa medical examination ang biktima.
Samtang suno naman kay PMAJ Rolando Araño, hepe sang Tigbuan Municipal Police Station indi na pagpasakaan pa sang kaso ang bata sang amo sang biktima.
Dugang sang natungdan, nahisugtan sang duha ka bahin nga husayon nalang ang problema paagi sa pagpasabat sa suspek sa tanan nga galastuhon sang biktima sa ospital.
Santo sa pahayag ni Araño, nakapauli na sa ila puluy-an ang biktima matapos nga ginsugat mismo sang barangay officials sang Jereos, Lapaz.
