Gin-ako kag ginsaysay sang 20-anyos nga lalaki ang iya ginhimo nga pagpangawat kag pagpatay sa isa ka 86-anyos nga babayi sa Barangay Calaboa Oeste, Santa Barbara, Iloilo.
Matandaan nga ang biktima amo si Marina Silao Bora, samtang ang suspek naman nga natigayon nga mapreso kahapon, Abril 13, amo si John Lloyd Mahilum, residente man sang amo nga lugar.
Abril 12 sang nasapwan ang bangkay ni Bora nga yara na sa early state of decomposition kag may pilas sang pagkabuno sa wala nga dughan.
Nadulaan ini sang P150,000 nga cash, mga alahas nga ginabanta tubtub sa P400,000 ang bili, kag duha ka mga cellphone.
Kahapon, mismo ang iloy sang suspek nga yara pa sa Saudi Arabia ang nagpahibalo sa punong barangay sa lokasyon sang iya nga anak kag sang plano sini nga magpalagyo.
Sa interview sang Bombo Radyo kay Punong Barangay Herminigildo Silao, iya ginpahayag nga wala na nila ginhulat ang pulis kag gindiretsuhan na ang lokasyon ni Mahilum sa Leganes bangud nagabantay na ini sang salakyan agud magpalagyo.
Suno kay Silao, ginlibutan nila si Mahilum kag sang na-corner na, nagtawag sa police station sa Leganes agud nga ma-turn over ini sa Sta. Barbara MPS.
Ginpahayag sang punong barangay nga nag-ako ang suspek sa iya nga ginhimo.
Sandig sa panaysayon sini, sa mayor ini nga pwertahan naglabay kag ginhulat lang niya nga magpa-banyo ang tigulang antes ginsulod ang kuwarto.
Pagkasulod sa kuwarto, nagpanago pa ini sa idalom sang katre kag ginhulat nga makatulog liwat ang tigulang.
Sang nanotisyaran sini nga napiyungan na liwat ang biktima, nagsugod na ini sa pagpangukay sang mga gamit apang nakabugtaw si Bora.
Suno sa punong barangay, ginrason sang suspek nga nahinalian siya rason nga ginbuno na lang si Bora rason sang iya kamatayon.
Sang amo nga tion, nabilin ang relo sang suspek sa hulot sang biktima rason nga siya man ang ginsuspetsuhan sa amo nga krimen.
Hunong ini subong sa presuhan kag natalana nga magpangatubang sang kaso nga Robbery with Homicide.
