20 ka mga personnel sang PSTMO, may yara sang less contact sa driver sang talatapan nga nagpositibo sa COVID-19

ILOILO CITY – May yara na sang 20 ka mga personnel nga na trace ang Public Safety and Transportation Management Office (PSTMO) nga may yara sang exposure sa driver sang talatapan nga nag positibo sa Coronavirus Disease 2019 (COVID-19).

Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ang 20 ka mga personnel ang makabig lamang nga less contact sang driver.

Suno kay Conlu, ang contact tracing ang padayunon subong nga adlaw.

Ang nasambit nga driver amo ang nagasugat sa mga Locally Stranded Individuals kag repatriated Overseas Filipino Workers.

Hunyo 19 tubtob Hunyo 20 sang nagpahayag ang driver nga daw ubohun ini kag ginpanugyanan na lamang siya nga indi na mag duty pa.

Hunyo 22 sang ginpa-idalom ang driver sa nasal swab test kag makaligad ang pito ka adlaw, naguwa ang resulta nga nagpositibo ini sa COVID-19.