Padayon pa nga nagalala ang kinagamo sa Middle East matapos nga napatay ang kapin 20 ka mga tawo sa ginpatigayon nga airstrikes sang Israel sa northern Lebanon kag indi magnubo sa lima ang napatay naman sa Gaza.
Pagtuman ini ni Prime Minister Benjamin Netanyahu sa iya promisa nga indi mag-untat sa pag-atake sa Hezbollah sa diin man nga parte sang Lebanon kalakip na ang kapital nga Beirut.
Ini kasunod sang drone attack sang Hezbollah sa Israeli army base nga nagpatay sa apat ka suldado kag nagsamad sa kapin 60 ka tawo sa isa sa ginakabig nga pinakamaduguon nga assaults sa Israel humalin sang nagsugod ang giyera sang Oktubre.
Nagpabutyag naman ang foreign ministers sang UK, France, Germany kag Italy sang kahangawa para sa seguridad sang UN peacekeeping forces sa southern Lebanon.
Nahibaluan nga nagkalapilasan ang UN peacekeepers matapos nga naigo sang Israeli strikes ang lugar nga ila nahamtangan.
Samtang, una naman nga naghingyo ang Israel sa US sang advanced missile defense system kun sa diin nagsabat ang Pentagon nga mapadala sila sang advanced anti-missile system — kag ang US troops ang maga- operate — agud buligan ang Israel nga mapabaskog ang ila depensa.
