Nagluntad ang daku nga gamo sa central Thailand matapos nakaguwa ang 200 ka mga amo kag nag-“riot” sa lugar.
Natabo ini sa Pho Khao Ton Monkey Nursery sa Muang district sa munisipalidad sang Lop Buri.
Ginkinahanglan pa nga butangan sang barikada ang Tha Hin police station agud nga maproteksyunan sang mga pulis ang ila estasyon kag ang importante nga mga dokumento.
Suno kay police captain Somchai Seedee, ginsiraduhan man nila ang mga puertahan kag mga bintana para nga wala sang makasulod.
Gintawag man ang on-duty nga mga pulis kag officers para nga maka-augment sang nagsaka na ang mga amo sa atop sang police station kag sa kaiping nga mga balay sang mga tawo.
Nagbuligay man ang lokal nga otoridad para nga mapalayo ang mga sapat sa residential areas paagi sa paghatag sa ila sang pagkaon sa malayo nga mga lugar.
Ginkaayo man ang cage kag nagpadala ang Department of National Parks, Wildlife and Plant Conservation (DNP) sang dugang nga workers agud madakop ang iban nga mga amo kag mabalik sa paghinakop sang ahensya.
Nahibaluan nga madugay na nga nagasuprer ang mga tawo sa Lop Buri sa nagadamo pa gid kag agresibo nga populasyon sang mga amo kag may yara na sang special enclosures agud nga ma-contain ini nga grupo sang mga sapat. Lakip sa gina-reklamo bangud sa kadamuon kag co-existence sang amo sa mga tawo amo ang vandalism, mobfights, kag pagpang-agaw sang mga pagkaon.
May espesyal na nga lugar ang mga amo sa tagipusuon sang mga Thai nga naangot man sa ila tradisyon kag mga pagpati.
