ILOILO – Naglab-ot sa 200 ka mga pasyente ang ginhatagan sang medical care sang Iloilo Provincial Health Office kadungan sang selebrasyon sang Dinagyang Festival 2025.
Sa interview sang Bombo Radyo kay Dr. Rodney Labis, Chief sang Health Service Delivery Division, iya ginpahayag nga sa sulod sang duha ka adlaw, halin sa Kasadyahan sa Kabanwahanan tubtob sa Dinagyang Tribes Competition, nakarekord ang Iloilo Provincial Government sang 10,000 tubtob 15,000 ka tawo sa area lang sang Capitol.
Suno kay Labis, ang mga pasyente nga ginrespondehan sang medical teams ang kalabanan minor medical cases kaangay sang paglingin sang ulo, pagtaas sang blood pressure, pagbatyag sang sintomas sang heat exhaustion kag may isa ka pasyente nga gin-refer sa ospital.
May mga ginhatag man ang Iloilo Provincial Health Office nga HIV Counseling and Screening Services sa 160 ka mga tawo kag masobra 10,000 condoms naman ang na-distribute.
Pahayag niya, wala sang may na-monitor nga food poisoning cases sa Food Festival sang Provincial Government.
Apang madamo sang nahatagan sang citation ticket bangud sa pagpanigarilyo kag pag-vape sa pampubliko nga lugar.
