ILOILO – Magapatigayon ang Iloilo Provincial Government pinaagi sa Provincial Government Environment and Natural Resources Office sang mangrove planting kag coastal cleanup sa Abril 29 sa Barangay Culasi, Ajuy, Iloilo.
Sa interview sang Bombo Radyo kay Mitzi Peñaflorida, senior environmental management specialist, iya ginpahayag nga ang nasambit nga aktibidad ang naangot pa sa pag-obserba sang Earth Day 2023 sang Abril 22 nga may tema nga “Invest in our Planet”.
Suno kay Peñaflorida, gin-schedule nila ang aktibidad isa ka semana matapos ang Earth Day bangud sa tidal calendar sa diin high tide ang Abril 22 kag indi mahimo nga makatanom sang mangroves.
Ginabanta 2,000 ka mga bungalon propagules ang itanom sang provincial government employees kaupod ang mga empleyado sang Ajuy local government, barangay officials kag residente sang Barangay Culasi.
Mangroves ang napilian sang Provincial Government nga itanom bangud nagaserbe ini nga second line defense sa coastal areas sa pagbuhin sang coastal erosion kag epekto sang storm surge nga dala sang weather disturbances kaangay sang bagyo kag tsunami.
Kada tuig ukon Earth Day pahayag sang natungdan, may yara sang ginapatigayon nga mangrove planting activity bilang inisyatibo sang provincial government kag local government unit apisar pa nga wala sang mandu halin sa Department of the Interior and Local Government.
Magluwas sa Barangay Culasi, tanan nga 43 ka mga banwa lakip na ang syudad sang Passi ang magapatigayon man sang tree planting activities sa ila tagsa ka mga lugar sa bulig sang Provincial Government Environment and Natural Resources Office sa Sabado.
Lakip man sa itanom amo ang native kag fruit-bearing trees kaangay sang narra, chico, santol, molave, ilang-ilang, banaba, toog, duhat, caimito, cabugao, lansones kag sambag.
Gin-engganyo man ni Peñaflorida ang mga Ilonggos nga padayon nga magtanom sang puno partikular na ang mga fruit-bearing trees bangud makabulig ini sa pag-mitigate sang epekto sang climate change.
Nahibaluan nga nag-umpisa ang annual tree planting activity sang provincial government sang tuig 1988 kag nakabaton ini sang suporta sang ginlunsyar ang “Piyesta sa Kakahuyan” sang September 2000 sa idalom sang administrasyon ni anay Governor Arthur Defensor Sr.
