Ginalantaw sang independent research group nga mas magataas pa ang kaso sang COVID-19 sa Pilipinas sa diin posible nga makarekord sang 20,000 ka mga new infections kada adlaw pag-abot sa bulan sang Abril.
Suno kay Dr. Guido David sang OCTA Research team, ginbasehan nila ang reproduction number subong sang pungsod nga yara sa 1.9.
Ang reproduction number sang isa ukon mas mataas pa ang indikasyon sang padayon nga paglaton sang virus.
Apang pahayag niya, mahimo pa ini nga malikawan kun ang national kag local government units ang padayon man nga nagapatuman sang minimum health protocols, localized lockdowns kag curfew hours.
Gintumod man sang research team ang 12 ka mga syudad sa Metro Manila nga nalakip sa top 15 areas nga may yara sang “upward trend” ukon mataas nga pagsaka sang numero sang new COVID-19 cases.
Lakip sa 12 ka mga syudad amo ang mga masunod;
Quezon City, Manila, Pasay, Makati, Parañaque, Taguig, Caloocan, Pasig, Malabon, Valenzuela, Marikina, kag Navotas.
Nahibaluan nga ang OCTA team ang ginalakipan sang mga eksperto gikan sa University of the Philippines amo man ang mga contributors gikan sa University of Santo Tomas kag Providence College sa Rhode Island sa Estados Unidos.
