Naghatag si Bureau of Immigration (BI) Commissioner Norman Tansingco sang 60 ka adlaw nga plaso agud nga makabiya sa Pilipinas ang ginabanta nga 20,000 ka foreign workers nga nagatrabaho sa Philippine Offshore Gaming Operators (POGOs) kag Internet Gaming Licensees (IGLs).
Kasunod ini sang mandu ni President Ferdinand Marcos Jr. kadungan sang iya nga State of the Nation Address (SONA) nga i-ban na ang mga operasyon sang amo nga negosyo sa Pilipinas bangud sa nanari-sari nga krimen nga naangot sa ila kaangay sang human trafficking kag pagpang-scam.
Suno pa kay Tansingco, ang pending kag bag-o nga visa applications sang POGO kag workers sang IGLs ang lunsay na iga-deny sang ahensya.
Nagpaandam man ini nga may lista siya sang foreigners nga nagatrabaho sa amo nga mga negosyo kag ang kutob sang violators ang iga-subject sa deportation proceedings.
Ginmanduan man sang commissioner ang intelligence division kag fugitive search units nga pabaskugon pa ang pag-aresto sa violators sa illegal online gaming hubs.
Nahibaluan nga naga-trabaho ang BI kaupod sa Philippine National Police, Armed Forces of the Philippines, kag National Bureau of Investigation agud nga panglagson ang foreigners nga may kahilabtanan sa iligal nga mga aktibidad.
Yara na sa 2,300 ka workers ang na-deport sang ahensya bangud sa pag-operate sa scam hubs samtang nagapakuno-kuno nga naga-trabaho sa gaming companies sa pungsod.
