ILOILO CITY--Ginkwestyon ni 2nd District Board Member Liezel Mondejar Seville kun san-o ang plano nga mapasar ang 2019 annual budget sang probinsya sang Iloilo.
Sa ginpatigayun nga sesyon, sang Sangguniang Panlalawigan, gin usisa ni si Seville tuhoy ang update sa budget.
Suno kay Liga ng mga Barangay President Dorothy Paes , Chairman sang Commitee on Appropriations sa Sangguniang Panlalawigan, iya ginpahayag nga nagmeeting na sila sa local finance, kag nabatun na nila ang itemized kag breakdown sang 20% development fund nga ginapangayo sang Commission on Audit.
Samtang suno naman kay 4th district board member Dominggo Oso, vice chairman sang Commitee on Appropriations, iya ginpahayag nga ang ila lang nga ginapangayo amo ang itemized projects kag programs sang 20% development fund agud mapasar na ang budget sang probinsya.
Pahayag pa ni Oso nga indi man dapat pagbasulon ang komitiba sa pagkadelay sang budget bangud kun gilayun nga nahatag kag na transmit ang ila napangayo nga itemized project matigayun man ang pagpasar sang budget.
Nahibaluan nga nagpahamtang sang tarpaulin ang mga empleyado sang kapitolyo nga nagahingyo sang gilayun sang madasig nga pagpasar sang 2019 annual budget.
