Nagbanggi-anay ang mga myembro sang Sangguniang Panlalawigan may kaangtanan sa wala gihapon mapasar nga 2019 budget sang probinsya sang Iloilo.
Sa interview sang Bombo Radyo kay Vice Governor Christine ‘Tingting’ Garin, presiding officer sang Sangguniang Panlalawigan, iya ginpahayag nga mas maayo nga magpasa ang mga departamento sang provincial government sang na-itemize nga mga proyekto sa idalom sang 20% development fund sang probinsya sang Iloilo.
Ini bilang pag-comply sa rekomendasyon sang Commission on Audit (COA) nga pag-hatag sang listahan sang specific nga mga proyekto sa idalom sang development fund.
Suno kay Garin, katuyuan sini nga mahibaluan sang Committee on Appropriations sa Sangguniang Panlalawigan kun pila ang nagamit nga budget kag agud matumod kun pila ang ginakinahanglan nga budget para sa masunod nga tuig.
Samtang, gin-ugyunan naman si 4th district Board member Domingo Oso sa pahayag ni Garin.
Suno kay Oso, myembro sang Committee on Appropriations, madugay na nga ginareklamo sang COA nga may development fund sang nagliligad nga mga tinuig nga wala man magamit gani importante ang pag-itemize sang mga proyekto.
Sa pihak nga bahin,baliskad naman ang panindugan ni 3rd district Board Member Lorenz Defensor tuhoy sa budget.
Suno kay Defensor, common sense nalang ang makahangop nga indi ma- itemize ang mga proyekto bangud indi man mapaktan kun ano ang pangayuon sang barangay, mga banwa ukon mga pumuluyo sa probinsya sang Iloilo.
