ILOILO CITY – Makabig nga ‘lackluster year’ ang 2019 sa patag sang Philippine pageantry.
Sa Good Morning Philippines program, ginpahayag ni Rey Emmanuel Echaveria, economic specialist, nga indi mahinago nga mas manubo ang achievement sang mga tiglawas sang Pilipinas sa international pageants subong nga 2019 kun ipaanggid sa mga nakaligad nga tuig.
Suno kay Echaveria, normal lamang ang setback ukon ang pagkapaslaw bangud nga indi sa tanan nga tion, ang Pilipinas ang nagapangibabaw sa beauty pageants.
Ginpahayag ni Echaveria nga kadam-an ang may yara sang high expectations ilabi pa nga nagbilin sang marka si Miss Universe 2018 Catriona Gray.
Sa pihak sini, ginpahayag sang natungdan nga indi dapat pag-ilugon kun ano ang ginhimu ni Catriona bangud nga ang tagsa ka kandidata ang may yara sang kaugalingon nga abilidad nga mangin liyabe agud makuha ang korona.
Sa 2020, madamu ang mga balantayan sa patag sang Philippine pegeantry ilabi pa nga nagseparar na ang Miss Universe Philippines sa Binibining Pilipinas.
Lauman suno kay Echaveria nga mangin maid-id ang pagpili sang mga kandidata nga magatiglawas sang Pilipinas sa international pageants.
Kadungan sang bag-o nga tuig suno sa natungdan, bag-o nga pamaagi kag mga competitive beauty contestants ang masaksihan.
