Prayoridad sang Senado kag sang Kamara ang pag-ratify sa P5.024-trillion 2022 national budget kadungan sang pag-resume sang ila sessions subong nga Lunes kasunod sang Halloween break.
Suno sa statement nga gin-isyu ni House Speaker Lord Allan Velasco, siguraduhon nila nga makalab-ot kay Presidente Rodrigo Duterte ang budget bill antes matapos ang tuig 2021.
Ginpahayag man ni Velasco nga “same page” ukon nagahangpanay ang Kamara kag ang Senado pag-abot sa paghimo sang 2022 budget bilang nagapanguna sa agenda.
Matandaan nga sang Setyembre 30, gin-aprubahan sang Kamara sa third kag final reading ang proposed P5.024-T nga budget para sa 2022. Sang Oktubre 25, ginpasa ini sa Senado.
Magluwas sa national budget, lakip man sa unahon sa agenda sa Kamara amo ang discussion sa fuel excise taxes bangud sang asud-asud nga pagsaka sa presyo sang gatong.
Sa bahin sang Senado, nagpasalig si Senate President Vicente Sotto III nga indi pagpabay-an ang legislative agenda apisar nga maathag nga masako na ang mga senador sa pagpakadto-pakari matapos sang filing sang certificates of candidacy (COC) para sa 2022 elections.
Una na nga ginpahayag ni Sotto nga may patigayunon nga caucus sa scheduling sang budget debates agud nga mapasar nila ang pending bills kag ang proposed national budget antes ang Christmas break sa Disyembre 16. ##
