Iloilo City – Magatakop na subong nga adlaw, Enero 31 ang voter’s registration para sa 2023 Sangguniang Kabataan kag Barangay Elections.
Kaangot sini, ginpahanumdom sang Commission on Elections sa publiko nga magpadulong sa pinakamalapit nga opisina agud marehistro.
Sa interview sang Bombo Radyo kay Mr. Jonathan Sayno, Election Assistant II sang Iloilo City Commmission on Elections Office, iya ginpahayag nga pwede makaparehistro sa ila talatapan ang naga-edad sang 15 pataas.
Suno kay Sayno, indi na bag-o sa ila nga makaeksperyensya sang pagdugok sang mga tawo sa ulihi nga adlaw sang voter registration, apang preparado ini nga magbaton sang tanan nga mga applications.
Nagpanugyan man ang natungdan nga magdala ang publiko sang valid government-issued Identification Card ukon company Identification Card.
Pananglitan nga wala sang amo sini nga Identification Card, nagabaton man ang Commission on Elections sang barangay certification nga may picture kag pirma sang barangay kapitan.
Dugang pa ni Sayno, ang opisina ang nagabaton man sang application sang pag-transfer sang polling precinct, correction of entries, kag reactivation sang voter’s registration.
Wala naman sang kasugpon ukon extension date ang voter’s registration sa pungsod.
Bukas subong nga adlaw ang opisina sang Commission on Elections umpisa las 8:00 sang aga tubtob las 5:00 sang hapon.
