Opisyal na nga gin-umpisahan sang Committee on Appropriations sa Kamara ang deliberasyon sa ginaproponer nga P6.793 trillion national budget para sa 2026.
Lakip sa nagkadto sa budget briefing amo sanday Budget Secretary Amenah Pangandaman, Economic Planning Secretary Arsenio Balisacan Jr., kag Finance Secretary Ralph Recto.
Nagtambong man sa briefing sang Development Budget Coordination Committee (DBCC) sanday Majority Leader Ferdinand Alexander Marcos, Senior Deputy Speaker David Jay-jay Suarez, Committee on Appropriations senior vice chairperson Albert Garcia, House leaders kag iban nga House members.
Sa iya nga speech, nagpasalig si House Speaker Martin Romualdez nga mangin ma-id-id sila sa pagbusisi sa 2026 proposed national budget agud masiguro nga ang kada piso ang magatupa gid sa maayo nga tinutuyo kag mapaayo ang kabuhi sang mga Pilipino.
“Just as every Filipino household plans its budget with care, we too must ensure that each peso serves a meaningful purpose… Bawat gastusin ay dapat may pakinabang sa tao,” suno sa house leader.
Ginpasalig naman ni House appropriations committee chairwoman Rep. Mika Suansing nga naka-sentro para sa benepisyo sang mga Pilipino ang proposed budget.
Pahayag sini, mabatyagan kag makit-an sang mga Pilipino ang mapuslanon nga mga serbisyo kaangay sang mas mahapos nga pagpabulong, mas dekalidad nga edukasyon kag mga classroom, mas maayo nga trabaho kag mga dalan.
“Sisiguraduhin po ng Kongreso na ang P6.793 trillion na budget ng ating bansa ay pakikinabangan ng ating mga kababayan. Mararamdaman at makikita po ninyo ito: Mas maginhawang pagpapagamot, mas dekalidad na edukasyon at mga classroom, mas maraming dekalidad na mga trabaho, at mas magandang mga kalsada para sa mga magsasaka,” suno sa kongresista.
Una na nga ginpasalig ni President Ferdinand Marcos Jr. sa iya ikaapat nga State of the Nation Address nga indi sini pagpirmahan ang national budget kun nag-“misalign” ini ukon wala nagasanto sa mga programa sang iya nga administrasyon.#
