Nag-imbitar ang organizers sang 24 ka dekalidad nga judges agud nga makapili kun sin-o ang magapangibabaw sa pinaka-balantayan nga mga aktibidad sa Dinagyang Festival 2026.
Sa interview sang Bombo Radyo kay Elvert Bañares, head sang Committee on Judges sa Dinagyang Festival 2026, iya ginpahayag nga sa numero nga ini, lima ang bag-o, samtang ang iban naman ang naka-agi na pungko bilang judges sa nauna nga mga edisyon sang world-class nga Dinagyang.
Ini nga judges ang makabig suno sa iya bilang “best people” sa patag sang culture and arts, dance, direction, kag iban pa.
Wala sini gindetalye kun sanday sin-o sila, apang suno sa iya, kilala, naapresyar, kag ginakalangkagan gid sang judges ang Dinagyang.
“We assure you, they know Dinagyang, they appreciate Dinagyang, and they look forward to Dinagyang,” suno kay Bañares.
Dugang sini: “I’m very happy to say nga ang gin-invite naton nga judges, maabot sila sa January 23, in time for the ILOmination, and then ma-judge sila sa Kasadyahan, kag ma-judge man sila sa Dinagyang. Sa hapon, sa Sadsad.”
Sandig sa schedule nga gin-release sang Iloilo Dinagyang Festival, matabo ang Ilomination Streetdance Competition sa Enero 23.
Matuon naman sa Sabado, Enero 24, ala una sang hapon, ang Kasadyahan sa Kabanwahanan, samtang alas otso sang aga sa Domingo, Enero 25, ang Dinagyang Tribes Competition.
Alas tres sa hapon naman maga-umpisa ang Sadsad sa Calle Real.
Naka-sentro ang tema sang Dinagyang 2026 sa “Bugay sang Ginoo. Bugal sang mga Ilonggo.”
