Sa masobra 1,700 ka mga barangay sa bilog nga probinsya sang Iloilo, may 21 pa nga wala na-clear sa iligal nga droga.
Suno ini sa data sang Iloilo Police Provincial Office (IPPO) subong nga nagahingapos na ang 2023.
Sa interview sang Bombo Radyo kay Police Colonel Ronaldo Palomo, director sang IPPO, iya ginpahayag nga sa 21 ka mga barangay, siyam gid diri ang naghalin sa banwa sang Oton.
Gintumod sini nga rason ang pagpositibo sang pila ka drug surrenderers sa iligal nga droga.
Ang iban pa nga nga indi drug-free nga mga barangay ang nahamtang sa Estancia, Tigbauan, Balasan, San Enrique, kag Sara.
Gin-athag man sang director nga wala sang natumod nga organized drug group sa probinsya.
Ang ginakabig nga pinakadaku nga recoveries sang otoridad sa Western Visayas subong nga tuig amo ang P40.8 million nga balor sang shabu kag pagkadakop sa isa ka high-value individual sa buy-bust sa Janiuay, Iloilo sang nagligad lamang nga Disyembre 17.
Ini kasunod sang P20-million man nga nakumpiskar sa Jaro, Iloilo City sang nagligad nga Nobyembre 9.#
