Nag-abot na sa Manila sang Sabado sang aga ang 21 ka mga opisyal sang gobyerno sang Pilipinas nga na-stranded sa Israel bangud sang nagapadayon nga tensyon sa tunga sang Israel kag Iran.
Ang mga opisyal — 17 ka mga lokal nga opisyal sang gobyerno nga nagtambong sa agricultural technology training kag apat ka mga eksperto sa industriya sang gatas halin sa Department of Agriculture (DA) — kon sa diin ginsugat sa Ninoy Aquino International Airport Terminal 3 ni Department of the Interior and Local Government (DILG) Secretary Jonvic Remulla.
Sa 17 ka mga opisyal, duha ang mga kongresista, siyam ang mga alkalde (mayors), apat ka mga bise-alkalde (vice mayors), kag duha ang regional directors. Nagsugod ang ila training sang Hunyo 10 kag ginplano nga matapos ini sa Hunyo 20.
Ginpahayag ni Remulla nga safe kag maayo ang kahimtangan sang tanan nga 21 ka opisyal.
Nagpasalamat man si Remulla sa gobyerno sang Israel, sa mga opisyal sang Philippine Embassy sa Israel kag Jordan, kag sa iban pa nga ahensya sang gobyerno sa ila dasig nga koordinasyon agud mapapauli ang mga na-stranded nga Pilipino.
Suno kay Remulla, halin sa kibbutz nga ila gin-estaran sa Israel, nagsakay ang mga opisyal sa bus padulong sa Amman, Jordan. Halin didto, nagsakay sila sang eroplano padulong sa Dubai, kag halin sa Dubai, nagpauli sila sa Manila paagi sa commercial flight.
