ILOILO CITY – Nagdangat sa 21,000 ka benepisyaryo sang Pantawid Pamilyang Pilipino Program sa Western Visayas ang nag-graduate na sa programa humalin sang nagligad nga tuig tubtob sa 1st quarter sang 2023.
Ang nasambit nga programa ang isa sa mga inisyatibo sang national government agud maghatag sang bulig pinansyal sa ginakabig nga poorest of the poor ukon pigado nga mga Filipinos samtang ginabatuan ang intergenerational poverty cycle sa Pilipinas.
Sa interview sang Bombo Radyo kay Atty. Carmelo Nochete, director sang Department of Social Welfare and Development Region 6, iya ginpahayag nga mahimo i-absorb sang Sustainable Livelihood Program ang mga graduates, apang nagakadapat nga may yara ang mga ini sang entrepreneurial skills.
Suno kay Atty. Nochete, indi ini automatic bangud kinahanglan nga i-screen ang graduate kun mabaton ini sa programa.
Ginpahayag dugang sang natungdan nga matapos ang nangin improvement sa kabuhi sang mga graduates, nagapati ini nga masarangan na sang mga ini ang magpangabuhi nga wala na sang bulig sang programa.
Para kay Nochete, mabudlay batunon ang graduation sa mga myembro, apang kinahanglanon ini agud matinluan kag ma-update ang beneficiaries, kag mabuligan ang mas nagakinahanglan.
As of June 8, 2023, may yara sang 309,000 ka myembro sang Pantawid Pamilyang Pilipino Program, kun sa diin 80,000 diri ang ginalauman nga makatapos subong nga tuig.
