Ginalauman nga magaabot na diri sa Pilipinas karon sa hapon ang 21 sa 22 ka Pinoy seafarers nga sakay sang MV Tutor nga gin-atake sang Houthi rebels samtang yara sa Red Sea.
Ginkumpirma ini sang Malacañang matapos nga nagmandu si President Ferdinand Marcos Jr. sa government agencies nga buligan nga mapapauli ang apektado nga crew.
Sang Byernes sang gab-i, nagbuligay ang international forces kag ginsakay sa US Navy ship ang mga Pinoy kag gindala sa Bahrain suno naman sa Department of Migrant Workers (DMW). Didto kag gin-amuma sila sa pagpanguna ni Philippine Ambassador to Bahrain Anne Jalando-on Louis.
Ginalauman naman nga updan sila ni DMW labor attaché Hector Cruz nga mapapauli sa ila tagsa ka pamilya.
Sa bahin sang Overseas Workers Welfare Administration (OWWA), may koordinasyon na sa local manning agency para masigurado nga mahatag ang financial aid kag iban pa nga assistance sa sini nga mga Pinoy.
Isa sa ila ang nagapabilin nga missing kag ginapatihan nga na-trap sa engine room apang wala pa sang identity nga ginpagwa ang Philippine government officials.
Hunyo 12 sang nag-atake ang Houthi sa amo nga barko kag nagbalos naman ang US military paagi sa pagguba sang ila radar sites sa Yemen.
