Gin-diretso sa Bahrain ang 21 sa 22 ka Pinoy seafarers nga na-rescue matapos nga gin-atake sang Houthi rebels ang MV Tutor nga nagalayag sa Red Sea.
Suno sa Department of Migrant Workers (DMW), nagbulig ang US Navy ship agud mapasakay ang mga Pinoy kag madul-ong sa Port of Manama, Bahrain kag ginpahayag maga-abot 5:30 pm (Bahrain time) kag 10:30 kagab-i (oras sa Pilipinas).
Ginpasalig sang ahensya nga amumahon sang maayo kag hatagan sang assistance ang mga Pinoy samtang yara sa Bahrain.
Sa subong, padayon naman ang pagpangita sa isa ka Pinoy crew nga missing bangud sa amo nga atake.
Sa pihak nga bahin, nagmandu naman si President Ferdinand R. Marcos, Jr. sang whole-of-government approach agud mabuligan ang iban pa nga Filipino seafarers nga biktima sang pagpang-atake sang sini nga pro-Iranian rebel group sa Red Sea.
Nagapakig-angot ang Department of Foreign Affairs (DFA) sa foreign counterparts sini para nga mahilway na ang 17 Filipino seafarers nga ginbihag man sang Houthi rebels sang nagligad nga tuig. Sakay sila sa barko nga Galaxy Leader nga gindala na subong sang mga rebelde sa Yemen.
Gin-atake man anay ang barko nga True Confidence kun sa diin may duha ka Pinoy nga napatay kag 11 naman sa iban sa ila ang nakapauli sa Pilipinas. Ginapreparar gihapon suno sa natungdan nga marepatriate ang bangkay sang duha nga amo ang ginahulat sang pamilya diri sa Pilipinas.
Magluwas sa sini, sang Enero, may 18 man ka Pinoy nga sakay sa oil tanker nga St. Nikolas nga ginbanggaan sa Iran sa Gulf of Oman apang na-release na sa kada batch.
Sang Abril, ginsakop man sang Revolutionary Guards sang Iran ang MV Aries apang ginhilway man ang crew lakip ang apat ka Pinoy sang Mayo.
