Magaabot sa bulan sang Disyembre subong nga tuig ang 21,000 metriko tonelada sang bombay nga gin-import sang Pilipinas.
17,000 metric tons (MT) diri ang red onions samtang 4,000 MT naman ang white onions.
Suno kay Department of Agriculture-Bureau of Plant Industry Director Gerald Glenn Panganiban, katuyuan sang importasyon nga mapadamo ang suplay sang bombay sa Pilipinas kag indi magsaka ang presyo sa merkado sa tion sang Christmas holidays.
Image by Hans Braxmeier from Pixabay
Suno pa sa opisyal, nagatupa na subong sa P140-P180 ang presyo sang kada kilo sang pula nga bombay. Dugang sini, kun mag-abot na ang suplay sang imported onions subong nga semana, maganubo na ini nga presyo.
Ginpahayag man sini nga wala sang plano nga magpatuman sang suggested retail price (SRP) sa amo nga produkto.
Matandaan nga sang nagligad lamang nga bulan, nangin kontrobersyal ang nasambit nga bureau sang ginmanduan sang Kamara ang mga opisyal sini nga ipaathag kun ngaa nagdamo ang imported nga sibuyas sa local markets.
Nagpatigayon man ang DA sang imbestigasyon sa Bureau of Plant Industry kag nagpasa sang sabat sa show-cause order nga ginpapanaog sang House committee on agriculture and food.#
