Dead on arrival ang isa ka babaye matapos ginapahayag naghikog gamit ang lubid sa sulod sang ila balay sa Oton, Iloilo.
Ang biktima amo si alyas Gail, 22 kag ginapahayag nagsuicide bangud sa indi pag-intindihanay sa tunga sang iya ka live-in partner.
Sa interview sang Bombo Radyo kay Police Staff Sgt. Ma. Elena Doliguez sang Women and Children Protection Desk (WCPD) sa Oton, Municipal Police Station, iya ginpahayag nga nakapadala pa si Gail sang mensahe sa iya suod nga abyan nga babaye sa diin ginpabalo sini nga mahikog na ini.
Nagsend pa ang biktima pinaagi sa messenger sa iya abyan sang picture sang lubid nga gingamit sini sa pag-utas sang iya kabuhi.
Suno kay Doliguez, matapos sini, dali-dali nga nagpadulong ang abyan sang biktima sa balay sini.
Nasapwan ang biktima sa ikaduha nga panalgan sang ila balay kag nakabitay na nga wala sang kabuhi sa sulod sang ila hulot.
Ginpahayag ni Doliguez nga santo sa ila pagpanalawsaw sa pamilya ni alyas Gail, pila na ka-adlaw nga wala nagabugnohanay ang biktima kag ang iya live-in partner.
Posible suno sa pulis nga ang madalom nga lainay sang buot sang biktima kag sang iya kahagugma ang gintunaan sang insidente.
