STA. BARBARA, ILOILO – Nagapati ang pamilya nga wala sang foul play sa natabo nga paghikog sang 22 anyos nga lalaki sa Brgy. Lanag, Sta. Barbara, Iloilo.
Sa exclusive interview sang Bombo Radyo kay Rosemarie Andales, iloy sang biktima nga si Adrian, iya ginpahayag nga nagapati siya nga naghikog ang iya anak.
Suno kay Andales, antes pa man natabo ang insidente, wala man siya sang may nasat-uman nga lain kay Adrian.
Ginpahayag ni Andales nga sang nagligad nga tuig, naghikog man ang iya kamagulangan nga anak paagi sa pagluthang sa kaugalingon.
Nakamuno man sadto si Adrian nga luyag na niya nga mag-abat sa iya napatay nga magulang apang indi man mapat-od sang iloy kun ano gid ang matuod nga rason sang paghikog sang iya anak.
Nagpauli lang sa Brgy. Lanag si Adrian matapos nga nag-away sila sang iya amay nga nagatinir sa banwa sang Pavia, Iloilo.
Samtang, suno naman kay Jason, abyan sang biktima, isa ka mabuot nga sahi sang tawo si Adrian.
Ginpahayag ni Jason nga may yara pa sang boodle fight kag may yara pa sang imnanay nga natabo malapit sa irigasyon apang wala sang may ginsugid si Adrian.
Naglisensya pa si Adrian nga magpangihi apang wala lang matalupangdan ni Jason kun bala may dala nga bag ukon may taklos nga pusil ang biktima.
Santo sa pagpangusisa, may pilas ang biktima sa wala nga bahin sang tangkugo kag liog tuga sang .38 caliber revolver.
