Patay ang 22-anyos nga lalaki matapos ginbitay ang kaugalingon sa Banate, Iloilo.
Ang biktima ang ginlaragway sang pamilya nga mapisan kag nagabulig sa iya pakaisa sa pagbaligya sang street food sa distrito sang Molo, Iloilo City.
Antes ang paghikog sang biktima, asud-asud ang nangin post sini sa Facebook nga nagasaad nga ‘nakadulaan na siya sang gana’.
Sa interview sang Bombo Radyo kay Police Staff Sergeant Jhan Baylon, imbestigador sang Banate Municipal Police Station, iya ginpahayag nga nag-umpisa ini sang nadula ang P14,000 nga kuwarta sang biktima.
Sang Domingo sang udto, nakapanawagan pa ang biktima sa Facebook bangud nadula ang iya wallet nga may unod nga IDs kag ATM Card.
Nagapakitluoy ini nga ibalik ang ATM Card bangud ‘tuman ka importante.’
Sa amo man nga adlaw, nabalik man ang wallet upod ang ATM Card apang wala na ang unod nga kantidad.
Posible suno sa pulis nga gin-withdraw ini bangud yara man ang PIN nakasulat sa kahita.
Padayon ang pag-post sang biktima sa Facebook, kag nagpabutyag pa sang kalain sang buot bangud duha ka tuig sini nga ginsupot ang kuwarta agud ibakal sang iya handum nga motorsiklo.
Suno sa pulis, antes ang insidente, naka-inom inom pa ang biktima kag nagasaot-saot pa gani kaupod ang iban sini nga abyan.
Sang ulihi, nagbalik ini sa isa ka housing unit nga wala sang tawo kag didto na ginhimo ang pag-utas sang kabuhi.
Kumbinsido ang pamilya nga wala sang foul play sa likod sang kamatayon sini.
