Nasapwan nga nagahalamyangon kag wala na sang kabuhi ang 22 ka mga lamharon nga tawo nga ginabanta naga-edad 18-20 anyos sa sulod sang nightclub sa East London, South Africa.
Indi pa maathag kun ano ang rason sang kamatayon apang sandig sa inisyal nga pahayag sang Department of Community Safety in Eastern Cape Province, posible nga may natabo nga stampede sa overcrowded club.
Sa pahayag naman sang police minister, wala sang makit-an nga indikasyon nga may natabo nga stampede, bangud wala sang mga pilas ang lawas sang mga biktima.
Ginalikawan ang espekulasyon sa likod sang insidente rason nga gindala sa pungsod ang top police forensic team.
Ipatigayon ang toxicology tests agud mahibaluan kun ginpanghiluan ang mga biktima.
Natabo ini kadungan man sang end of school year celebrations nga masami ginapatigayon sang mga teenagers.
Misteryo ini subong sa bilog nga syudad, bangud kun basehan ang paglaragway sang local media, nakit-an nga nagahamyangon ang mga biktima nga daw nag-collapse lang sa salog samtang nagasaot ukon nagaistoryahanay.
