ILOILO CITY – Wala sang malain nga ginbatyag sa lawas ang 22 ka staff sang St. Paul’s Hospital of Iloilo nga amo ang una nga gintublukan sang Sinovac COVID-19 vaccine.
Ang 22 nga nagpasakop sa ceremonial vaccination kahapon, Marso 5, ang ginalakipan sang 9 ka doctor, 6 ka nurse, 3 ka madre, 1 ka medical tehnician, 1 ka housekeeper, 1 ka physical therapist, kag 1 ka clinic secretary.
Sa interview sang Bombo Radyo kay Dr. Ella Mae Divinagracia, infection control head sang nasambit nga ospital, iya ginpahayag nga wala sang reported adverse reaction magluwas lang sa duha ka personnel nga naka-eksperyensya sang soreness sa injection site.
May yara man nga nakabatyag sang katuyo apang wala ini direkta nga ginaangot sa pagpabakuna suno kay Divinagracia bangud masako man sila kahapon antes ang ceremonial vaccination.
Mismo si Divinagracia kag ang iya bana ang nalakip man sa 22 nga nakabaton sang una nga dose sang coronavirus vaccine.
Batunon sang 22 ka staff ang ila second dose 28 ka adlaw matapos na-avail ang first dose.
Ang vaccine rollout sa St. Paul’s Hospital of Iloilo ang umpisahan man sa Lunes, Marso 8, kag target nga matapos sa sulod sang 5 ka adlaw.
Ginapasigurado sang management nga scheduled ang vaccination sa ila staff agud indi sini maapektuhan ang hospital operations.
Nahibaluan nga 1,500 doses sang Sinovac vaccines ang ginpain para sa St. Paul’s Hospital of Iloilo bilang isa sa priority hospitals sa rehiyon apang 400 palang ang inisyal nga nakaabot.
