Patay ang 22 ka mga tawo sang naglupok ang lithium batteries sa isa ka daku nga factory sa South Korea.
Natabo ini sa South Korean primary battery manufacturer nga Aricell plant sa Hwaseong city nga nahamtang ginabanta 45-kilometros sa nabagatnan sang kapital nga Seoul.
Sa mga nagkalamatay, 20 ang foreign nationals lakip ang 18 Chinese, isa halin sa Laos, kag wala pa natumod ang nationality sang isa.
Base sa footage, tuman ka daku ang aso kag nagpadayon pa ang paglinupok apisar yara na ang mga bumbero samtang nag-collapse naman ang parte sang atop.
Ginapahayag nga may 35,000 battery cells sa storage sang ikaduha nga panalgan sa factory kag may iban pa nga nakatago sa iban nga areas.
Madasig nga masunog ang lithium batteries kag mabudlay pa ikontrol gamit ang conventional fire extinguishing methods rason nga madasig ang pagkarab-karab sa planta.
Nahibaluan nga leading producer ang South Korea sang sini nga baterya nga ginagamit sa madamo nga items halin sa electric vehicles pakadto sa laptops.
