Patay ang isa ka lamharon nga social media influencer sa Mexico matapos ini ginluthang samtang naga-livestream sa TikTok.
Ang biktima amo si Valeria Marquez, 23, nga kilala sa iya videos kaangot sa beauty kag makeup.
Sang Martes, yara si Marquez sa isa ka beauty salon sa syudad sang Zapopan kun sa diin siya naga-trabaho sang may nagsulod nga lalaki nga amo ang nagluthang sa iya.
Nakit-an pa ang tawo nga nagpulot sang iya nga cellphone antes ginpatay ang livestream.
Sandig sa statement sang Jalisco state prosecutor, gina-imbestigaran ang kaso nga naangot sa femicide ukon ang pagpangpatay sa mga babaye bangud sa rason nga naangot sa gender.
Popular si Marquez sa Mexico nga may 200,000 followers sa Instagram kag TikTok.
Antes sini nga kaso, may isa man ka babaye nga mayoral candidate sa state sang Veracruz nga gintiro-patay man samtang naga-livestream kaupod sa tatlo ka iban pa nga mga tawo.
Sang nagligad nga tuig, may yara sang 847 reported cases sang femicide sa bug-os nga pungsod. May yara naman sang 162 sa nauna nga tatlo ka bulan subong nga tuig sandig sa Mexican government figures.
