Nagasalalampaw nga panumbungon ang atubangon sang 23-anyos nga lalaki nga amo ang ginatudlo hungod nga nagsunog sang ila balay sa Fairville Subdivision, Brgy. Bolong Oeste, Sta. Barbara, Iloilo.
Ang suspek nga at-large pa subong amo si Marlou Araneta, residente sang amo nga lugar, kag ginapahayag nga hubog sang tion nga gihimo ang sala.
Sa interview sang Bombo Radyo kay Police Staff Sergeant Ricky Subaldo, imbestigador sang Sta. Barbara Municipal Police Station, iya ginpahayag nga antes ginsunog ang balay, may komosyon pa nga natabo sa tunga ni Araneta kag sa iya live-in partner.
Ginapahayag nga nag-init ang ulo ni Araneta bangud na-flat ang goma sang motorsiklo sang iya abyan matapos nga ginhulam sang utod sang iya nga live-in partner.
Suno sa pulis, sandig sa alegasyon sang pamilya, ginsakit ni Araneta ang iya nga anak kag live-in partner.
Sang ulihi, wala pa ini nakuntento, nagkuha sang pusil kag nang-taya taya sa mga tawo sa ila balay pati sa iya nga bayaw.
Sang naagaw ang pusil, binangon naman ang ginkuha ni Araneta kag ginpang-taya taya liwat.
Didto na kag nagpalagyo na lang ang iya nga mga bayaw nga lalaki.
Agud dugangan pa gid ang iya nga maoy, nagkuha si Araneta sang habol sa kuwarto, gindala sa kusina, gintutdan, kag ginbalik sa kuwarto kag didto na nga madasig nga naglapta ang kalayo.
Naupos gid ang bilog nga balay bangud human ini sa light materials.
Magapasaka sang complaint ang pamilya batok kay Araneta: paglapas sa RA 9262 ukon Anti-Violence Against Women and their Children Act of 2004, paglapas sa Republic Act 7610 ukon Special Protection of Children Against Abuse, Exploitation and Discrimination Act, kag grave threat.
