Samtang nagahilapit ang Paris Olympics, nabutang pa sa kontrobersiya ang kredibilidad sang hinampang matapos nagguwa ang report nga may 23 ka mga Chinese swimmers nga nagpositibo sa iligal nga substance antes pa man ang Tokyo Olympics sang 2021 apang naka-intra gihapon sa kumpetisyon.
Ginpahayag nga ginbaton sang World Anti-Doping Agency (WADA) ang pagpaathag sang Chinese authorities nga kontaminado ang kusina sa ila nga hotel rason nga naglagbong ang ila nga mga atleta sa drug test.
Partikular nga nakabutang sa report nga positibo ang Chinese swimmers sa trimetazidine (TMZ) nga isa ka prescription heart drug nga ginadumilian nga gamiton sang mga atleta bangud mas mapa-enhance sini ang performance sang tawo.
Wala man nakabutang sa paathag sang China kun ngaa nga na-contaminate sang amo nga drugs ang ila nga kusina.
Ang mas makakilibot pa sa report amo nga pila sa sini nga Chinese swimmers ang nagdaog pa sa Tokyo Olympics — lakip ang tatlo ka gold medals — kag ang kadam-an sa ila lakip ang two-time gold medalist nga si Zhang Yufei ang ginalauman nga magapasakop liwat sa Olympiada sa Paris subong nga tuig.
Mangin ang iban nga pungsod kaangay sang Australia ang nag-anunsyo na nga magapatigayon ini sang kaugalingon nga inquiry kun ano ka matuod ang naglupok nga balita bangud nga indi ini patas sa iban nga mga atleta.
Nagsabat naman ang China paagi kay foreign ministry spokesman Wang Wenbin nga “fake news” ang reports sa 23 ka Chinese swimmers nga nagpositibo sa ginadumilian nga substance.
Klaro suno kay Wang ang sabat sang World anti-doping agency nga kulang sila sa ebidensya agud nga kwestyunon pa ang bersyon sang China kun ngaa nagpositibo ang ila mga atleta.
Ginsulit man ni Wang nga indi guilty ang ila nga participants bangud nga nagsulod ang contaminated drugs sa ila lawas nga wala sila sang ihibalo rason nga indi ini makabig nga doping violation.
Panindugan pa sang spokesman, istrikto nga ginapatuman sang Chinese government ang zero-tolerance position kun doping ang pagahambalan.#
Manan Vatsyayana/Agence France-Presse — Getty Image
