Natalana nga pasaakan sang kaso ang 23 ka mga indibidwal nga nadakpan bangud sang pagtipon-tipon kag pagsugal sa isa ka namatyan sa Barangay Ingore, La Paz, Iloilo City.
Matandaan nga ginpatigayon sang Criminal Investigation and Detection Group (CIDG) -Iloilo Field Office ang operasyon matapos nabaton ang report nga may kapin isa ka bulan na nga ginahaya sa amo nga barangay kag madamo nga tawo ang nagakadto.
Sa 23 nga nadakpan sang CIDG, 16 ang naga-bingo, apat ang naga-mahjong, kag tatlo ang naga-tong-its.
Sa interview sang Bombo Radyo kay Police Major Jose Val Ladublan, hepe sang La Paz Police Station, iya ginpahayag nga ang 16 ka mga babaye nga nadakpan ang ginkustodiya subong sa La Paz Police Station.
Samtang ang pito ka mga lalaki nga nadakpan ang ginkustodiya naman sa CIDG-Iloilo Field Office sa Mandurriao, Iloilo City,
Suno kay Ladublan, kaso nga paglapas sa Presidential Decree No. 1602 ukon Anti-Gambling Law ang ipasaka sa 23 tanan ka mga nadakpan.
Samtang, ginapahayag nga Mayo 31 pa napatay ang tawo nga ginahamyang apang wala gilayon naka-secure sang death certificate ang pamilya rason nga naglawig ang paghaya diri.
Una na nagpagwa sang pagsulundan si Iloilo City Mayor Jerry Treñas kasunod sang pagpaidalom sa syudad sa Modified Enhanced Community Quarantine status sa diin ginalimitahan lamang sa tatlo ka-adlaw ang mga haya kag ang immediate nga family members lamang ang makatambong.
