Ginpasaka na ang kaso batok sa 23 ka mga indibidwal nga nadakpan nga nagsugal sa isa ka namatyan sa Barangay Ingore, Lapaz, Iloilo City.
Kahapon, ginpatigayon ang online inquest proceedings sa Lapaz Police Station. Kaso nga paglapas sa Presidential Decree No. 1602 ukon Anti-Gambling Law ang ginpangatubang nga kaso sang mga arestado.
P7,500 ang piyansa kada isa sa mga nadakpan.
Sa interview sang Bombo Radyo kay Police Major Jess Baylon, chief sang CIDG Iloilo City, iya ginpahayag nga indi naman mag-initiate ang CIDG sa pagpasaka sang kaso batok sa punong barangay sang Ingore, Lapaz nga napaslawan nga sawayon ang pagtililipon sang mga tawo sa iya barangay.
Apang gin-athag sang CIDG nga handa sila nga magkooperar kun magpadala sang request ang Department of the Interior and Local Government (DILG) nga mapasaka sang kaso batok sa barangay official.
Sa interview sang Bombo Radyo kay Police Major Jose Val Ladublan, hepe sang LaPaz Police Station, iya ginpahayag nga sa bahin sang pulis, mahimo man sila sang report kag ipasa sa DILG kaangot sa kun ano ang atubangon sang punong barangay.
Una na nga nagdepensa si Punong Barangay Jonathan Jalandoni nga ginapahanumdom man niya ang mga pumuluyo nga indi magsugal kag nagamonitor man siya kun san-o ilubong ang patay apang ginrason sang pamilya nga indi sila makalubong sa ila himata bangud wala pa sang gin-isyu nga death certificate.
Sa Executive Order 53 ni Iloilo City Mayor Jerry Trenas, ginapahanugutan ang haya sang patay sa kondisyon nga limitado lamang sa first-degree relatives ang makatinir sa balay kun sa diin nahamyang ang patay kag tatlo ka adlaw lamang ang maximum days sang paghaya.
