ILOILO CITY – Dakup ang 23 ka tawo bangud sang pagtipon-tipon kag pagsugal sa isa ka namatyan sa Barangay Ingore, Lapaz, Iloilo City.
Ginpatigayon sang Criminal Investigation and Detection Group (CIDG) -Iloilo Field Office ang operasyon matapos nabaton ang report nga may kapin isa ka bulan na nga ginahaya sa amo nga barangay kag madamo nga tawo ang nagakadto.
Sa interview sang Bombo Radyo kay Police Executive Master Sergeant Vicente Demadara, deputy chief sang CIDG- Iloilo City, iya ginpahayag nga sang ginkadtuan niya kag sang iya nga team, nakit-an nga nagapunsok ang mga tawo kag wala na nagasunod sa physical distancing protocol.
Magluwas diri, may mga kabataan pa nga nagapakadto-pakari man sa lugar.
Sa 23 nga nadakpan sang CIDG, 16 ang naga-bingo, apat ang naga-mahjong, kag tatlo ang naga-tong-its.
Gindala ang mga nadakpan sa Lapaz Police Station.
Ginapahayag Mayo 31 pa napatay ang tawo nga ginahamyang apang wala gilayon naka-secure sang death certificate ang pamilya rason nga naglawig ang paghaya diri.
Sa executive order ni Mayor Jerry Trenas sang ginpaidalom sa Modified Enhanced Community Quarantine (MECQ) ang Iloilo City, ginapahanugutan ang haya sang patay sa kondisyon nga limitado lamang sa first-degree relatives ang makatinir sa balay kun sa diin nahamyang ang patay.
Tatlo ka adlaw lamang ang maximum days sang paghaya sa patay santo sa EO sang alkalde.
SUNO SA PUNONG BARANGAY
Nagpaathag ang punong barangay sang Ingore, La Paz, Iloilo City kun ngaa naglab-ot sa kapin isa ka bulan ang haya sang patay sa ila nga lugar kag kun ngaa may nadakpan nga nagasugal nga mga pumuluyo nga nagatipon-tipon sa namatyan.
Sa interview sang Bombo Radyo kay Punong Barangay Jonathan Jalandoni, iya ginpahayag nga ginapahanumdom man niya ang mga pumuluyo nga indi magsugal kag nagamonitor man siya kun san-o ini ilubong.
Domingo, Hunyo 27, ilubong ang bangkay suno kay Jalandoni.
Una nga ginrason sang pamilya nga indi sila makalubong sa ila himata bangud wala pa sang gin-isyu nga death certificate ang barangay.
Apang suno kay Jalandoni, wala man sang nagpalapit sa iya agud mangayo sang bulig.
Kahapon suno sa iya, wala siya nakatutok sa monitoring bangud nagbantay siya sa baybay agud malikawan ang pagtipun-tipon sang mga tawo kadungan sang kapistahan ni San Juan de Bautista.
