Nabaton na sang Pilipinas ang labing-una nga shipment sang COVID-19 vaccines halin sa US drugmaker nga Moderna.
‘Las onse kagab-i, nag-abot sa Ninoy Aquino International Airport (NAIA) Terminal 3 ang initial delivery nga 249,600 doses sang Moderna COVID-19 vaccines.
150,000 doses diri ang magakadto sa gobyerno samtang 99,600 doses naman ang magapadulong sa International Container Terminal Services Incorporated, ang kumpaniya sang ports billionaire nga si Enrique Razon nga amo ang nagbakal sang bakuna para sa private sector.
Santo sa evaluation sang Philippine Food and Drug Administration, ang Moderna vaccine ang may yara sang efficacy rate nga 94% kag mahimo matublok sa nagaedad 18 anyos kag pasaka.
Una naman nga ginpahayag sang kumpaniya sang Moderna nga epektibo ang ila bakuna batok sa new coronavirus variants kaangay sang mga variant nga una nga natukiban sa India, Brazil, UK, kag South Africa.
Una na nga ginkumpirma ni Philippine Ambassador to the US Jose Manuel Romualdez nga tuman ka bastante ang doses nga magaabot sa Pilipinas ilabi na bangud prayoridad ini sang Estados Unidos.
Suno pa sa Philippine Embassy in Washington DC, 20 million doses sang Moderna vaccines ang ginalauman nga magaabot halin Hunyo tubtob Disyembre subong nga tuig.
