ILOILO CITY – Halos katunga pa lang sang mga Punong Barangay sa distrito sang Jaro sa syudad sang Iloilo ang nakuhaan sang swab sample para sa COVID-19 test.
Sa interview sang Bombo Radyo kay Punong Barangay Edwin Divinagracia Sr. sang San Vicente, Jaro kag Presidente sang Association of Barangay Captains sa Jaro district, iya ginpahayag nga 25 gikan sa 42 ka punong barangay ang nakapaidalom sa COVID-19 test.
Ang iban sa mga punong barangay suno kay Divinagracia ang natalana nga magpakuha sang swab sample sa masunod nga semana.
Nahibalu-an nga ang pagpaidalom sa COVID-19 test ang nangin mandatory kasunod sang mandu ni Iloilo City Mayor Jerry Treñas matapos nga may pila ka mga punong barangay ang nagpositibo sa virus.
