Nagluntad ang power interruption sa 25 ka mga kabanwahanan sa probinsya sang Iloilo bangud sa paglaslas sang Bagyo Tino.
Sa numero nga ini, pito ang may partial interruption sa suplay sang kuryente, samtang 18 naman ang total blackout.
Sandig sa 5:00 sa kaagahon nga report sang Provincial Disaster Risk Reduction and Management Office (PDRRMO) subong nga Myerkules, Nobyembre 5, fully-restored na ang suplay sa 12 pa lamang ka mga banwa.
Sa amo man nga updated report, 120,420 ka mga residente ang apektado sang bagyo halin sa masobra 37,000 ka mga pamilya sa 40 ka mga munisipalidad.
Nagdangat naman sa masobra 400 ka mga balay ang na-report nga naguba kun diin 418 ang partially damaged samtang 24 ang totally damaged bangud ginpangpalid sang hangin kag nagkalatumbahan sang kahoy.
Lakip sa mga banwa nga may na-record nga nagkalaguba nga mga balay ang Pavia, Pototan, Leganes, San Enrique, Lemery, Maasin, Batad, New Lucena, Cabatuan, kag Janiuay.
Ang ini nga numero ang ginalantaw nga magasaka pa bangud padayon ang pagsulod sang data nagikan sa nagkalain-lain nga banwa.
Nahibaluan nga pasado ala una kahapon sang hapon sang nag-landfall ang bagyo sa Iloilo City kun sa diin nabatyagan man ang kakusog sang hangin mangin sa mga kabanwahanan sa probinsya.# (Photo: ILECO III)
